Die program getiteld “Youth and the Challenge of Today” is daarop gemik om onderwysers toe te rus met die nodige kennis en hulpbronne om jeugdiges wat in krisis is, te kan bystaan. Ons tieners word oorval met probleme wat spruit uit maatskaplike, sosiale, en akademiese druk. Diegene wat met sodanige probleme worstel, verdwyn soms in die massa en onderwysers beskik nie altyd oor die nodige kennis en vaardighede om sulke leerders by te staan nie. Danksy TLC het Cillié nou nog vier gekwalifiseerde beraders wat leerders kan lei en bystaan met die uitdagings van vandag. Mevv. Syce, Neumann, me. Julies en mnr. Grobbelaar sluit hulle nou aan by mev. Ainslie om ‘n gedugte span onder die vaandel van LIP (Leerder Intervensie Program) te vorm. Die spannetjie het groot planne en het alreeds ‘n “kantoor” ingerig en begin met bemarking onder die leerders. Leerders word uitgenooi om enige probleme met enige lid van die span te bespreek. Die lede van LIP beoog ook om sekere sosiale kwessies met behulp van gassprekers aan te spreek. Die spanlede het geen tekort aan entoesiasme nie en sien daarna uit om die projek verder te voer.